Chuvash Bilingual Corpus

Text: ХLVIII сыпӑк

Section: Пуҫсӑр юланут

Author: Феодосия Ишетер

Source: Рид, Томас Майн. Пуҫсӑр юланут: роман / Майн Рид; вырӑсларан Ф. Ишетер куҫарнӑ. — Шупашкар: Чӑвашгосиздат, 1949. — 412 с.

Year: 1949; Added: 2021.01.11 15:55

Sentence: 221; Word: 2096

Text type: Prose

In Russian Theme: Unspecified

Исидора

Хӗвел тин ҫеҫ прерире горизонт тӗлнелле хӑпарчӗ. Унӑн ҫаврака дискӗ ҫӳллӗ курӑк тӗлӗнче ылтӑн одит пек йӑлкӑшма пуҫларӗ. Ылтӑн тӗслӗ ҫутӑ пайӑркисем саваннӑра унта-кунта сапаланса ларакан ҫӑра вӗтлӗх ӑшнелле пыра-пыра кӗреҫҫӗ. Шултӑра сывлӑм тумламӗсем халь те акацисем ҫинче ҫакӑнса тӑрса, вӗсен вӗт-вӗт ҫулҫисене усаҫҫӗ, ҫӗр ҫине куҫҫулӗ пек тумлам-тумламӑн ӳкеҫҫӗ. Вара йывӑҫсен тӳлек каҫ иртнӗшӗн макӑрнӑ пек, вӗсен сулхӑнпа нӳрлӗхрен уйӑрӑлас килмен пек, вӗсем кӑнтӑрлахи ҫунтаракан шӑрӑхпа хирӗҫ пуласран хӑранӑ пек туйӑнса каять. Кайӑксем, тухакан хӗвеле саламланӑ пек, туратсем ҫинче чӗвӗлтетсе лараҫҫӗ.

Анчах ҫакӑн пек пит ирхи сехетре ҫывӑрман ҫынна, Техасри прерисемсӗр пуҫне, урӑх ҫӗрте ниҫта та тӗл пулма ҫук пулӗ. Леона шывӗн хӗррисенче, Индж фортӗнчен виҫӗ мильӑра, пӗр темле юланут кӗлетки курӑнса кайрӗ. Лаша ҫинче епле ларса пынине, тумтирне — хулпуҫҫисем ҫинчи серапэне, пуҫӗ ҫинчи хура сомбрерӑна пӑхсан, кашниех ӗнтӗ: «Ку арҫын пырать» тесе шутлӗччӗ. Ҫапах та, ӗҫ Техасра кӑнтӑр-хӗвеланӑҫ енче пулса иртнине манма юрамасть: хӗрарӑмсем те унта лаша ҫине арҫынла утланса ҫӳреҫҫӗ, вара тумланасса та кирлӗ пек тумланса тухаҫҫӗ.

Пирӗн ирхи юланут та — арҫын мар, хӗрарӑм. Ҫавна пӗлме ҫӑмӑл. Чӗлпӗр тытса пыракан пӗчӗк аллине ҫеҫ пӑхмалла, тата пускӑчӗ ҫине пуснӑ пӗчӗк урине, йывӑр серапэ айӗнчен те палӑрса тӑракан хӗрарӑмӑн чипер ҫан-ҫурӑмне, юлашкинчен тата, сомбреро хӗрри айне пуҫтарса хунӑ пит хӳхӗм ҫӳҫне ҫеҫ пӑхмалла, — сирӗн умра хӗрарӑм пулни ҫинчен ним иккӗленмелли те пулмасть вара.

Вӑл донья Исидора Коварубио де-Лос-Ланос.

Нумай пулмасть, донья Исидора ҫирӗм ҫул тултарнӑ. Вӑл йӗпкӗн хура ҫӳҫлӗ те пит илемлӗскер. Анчах унӑн илемӗ вӑл — тигр амин илемӗ, ачашшӑн юраттарассинчен ытла вӑл хӑратса ярать, теме пулать. Ун сӑн-питне пӑхсан, ҫемҫешке пулни, хӑрани мӗне кӑшт та палӑрмасть. Ҫирӗплӗх, хӑюлӑх, паттӑрлӑх, хӗрарӑмшӑн пит палӑракан ӑс — акӑ мӗн курӑнать ҫав ҫамрӑк сӑн-питре. Тӗксӗм ӳт-тирӗ ҫинче питҫӑмарти хӗп-хӗрлӗ, ҫав тери ҫутӑ хӗрлӗ, вилмелле хӑрушлӑх пулас пулсан та, вӑл сӑнран ӳкес ҫук пек туйӑнать.

Хӗр Леона тӑрӑхӗнчи чӑтлӑхпа пӗчченех пырать. Инҫе те мар ҫурт курӑнса ларать, анчах хӗр унтан аяккалла каять. Вӑл ун куккӑшӗн, дон Сильвио Мартинецӑн гасиенди.

Ҫамрӑк мексиканка йӗнер ҫинче ирӗклӗ те шанӑҫлӑ ларса пырать. Ун айӗнче пит ҫивӗч лаша, анчах сирӗн ҫамрӑк юланутшӑн хӑрамалли ҫук, — вӑл хӑй лашине пит лайӑх тытма пӗлет.

Ҫӑмӑл лассона йӗнер пуҫӗ ҫине тирпейлӗн чӑркаса хунӑ. Исидора ҫав хатӗре кирек мӗнле мексиканец-мустангертан та кая мар тыткалама пӗлет, ҫавӑнпа вӑл мухтанать.

Вӑл юханшыв хӗррине каякан аслӑ ҫулпа мар, аяккинчи сукмакпа пырать; сукмакӗ куккӑшӗн гасиенди патӗнчен ҫывӑхри сӑрт тӑрринелле — Леона тӑрӑхӗнчи анатри пӗртен-пӗр тӳпемелле хӑпарса каять. Ҫӳле улӑхса ҫитсен, Исидора чӗлпӗре туртӑнтарса лартать, анчах лашине кантарас тесе мар, хӑй ҫитмелли ҫӗре ҫитрӗ вӑл. Ку тӗлте сукмак ҫӳремелли ҫулпа пӗрлешсе каять. Ҫул ҫывӑхӗнче пӗр-ик акр пысӑкӑш уҫланкӑ пур. Унта курӑк ӳссе ларнӑ, анчах йывӑҫ пек ӳсентӑрансем ҫук. Вӑл пит пӗчӗкҫӗ прери пек туйӑнать. Уҫланкӑна пур енчен те йӗплӗ вӗт вӑрман хупӑрласа тӑрать. Виҫӗ кӑшт ҫеҫ палӑракан сукмак ҫӑра тӗмӗсен чӑтлӑхӗ витӗр тухса, уҫланкӑран тӗрлӗ еннелле каять.

Исидора уҫланкӑна тухрӗ те, ун варринче чарӑнса, лашине мӑйӗнчен лӑп-лӑп ҫапса лӑплантарчӗ. Анчах вӑл кирлӗ те пулман пулӗ. Чӑнкӑ вырӑнпа хӑпарнӑран лаши пит ывӑнса кайнӑ та малалла каясшӑн туртӑнман, хускалман та.

— Эпӗ каланӑ сехетрен маларах ҫитрӗм, — терӗ Исидора, серапэ айӗнчен ылтӑн сехет кӑларса. — Вӑл килмест те пулӗ, тен? Ах, вӑл килме пултарсан! Мӗн капла, эпӗ пӗтӗмпех чӗтретӗп? Эпӗ ку таранччен нихӑҫан та ҫакӑн пек хумханманччӗ. Мӗн ку — хӑрани-и? Ия, ҫапла пулмалла ҫав… Пит тӗлӗнмелле, эпӗ юратнӑ ҫынтан, пӗтӗмпех каласан, хам юратнӑ пӗртен-пӗр ҫынтан хӑратӑп. Эпӗ дон Мигуэле юратнӑ тесе калама пулмасть пулӗ. Вӑл хама хам улталани, фантази выляни ҫеҫ пулнӑ. Телее пула эпӗ, вӑл хӑравҫӑ иккенне кура, хӑвӑрт тӳрлентӗм. Манӑн романтикӑлла шухӑшсенчи герой хӑйӗн пьедесталӗ ҫинчен анса кайрӗ, хам шухӑшлани йӑнӑш пулни курӑнчӗ. Халӗ ӗнтӗ эпӗ дон Мигуэль вӑрӑ-хурах пулса тӑни ҫинчен пӗлсен, ӑна пӗтӗмпех кураймастӑп, — ҫӳлти таса вӑйсем, тӗрӗс-ши ҫавӑ? Анчах эпӗ ӑна ҫак пӗччен ҫӗрте тӗл пулсан та, унтан хӑрас ҫук… Питӗ тӗлӗнмелле-ҫке: хӑв чи ырӑ этемсем хушшинче чи илемлӗскер тесе шутлакан юратнӑ ҫынтан хӑратӑн, ҫав вӑхӑтрах тата ху шутсӑрах курайман ҫынтан пӗртте хӑрамастӑн, унӑн пӗтӗм хытӑ чӗрине тата усал чеелӗхне пӗлсе тӑран пулин те. Анчах кунтан ним тӗлӗнмелли те ҫук. Эпӗ чӗтрессине хӑрушӑлӑхран хӑранипе мар, хама юратмаҫҫӗ пулӗ тесе хӑранипе ҫеҫ чӗтретӗп. Ҫавӑнпа та эпӗ халӗ хам йӗнер ҫинче чӗтресе ларатӑп, акӑ мӗншӗн эпӗ хама Морис Джеральд тискер ӳсӗр ҫынсен аллинчен хӑтарнӑ кунтанпах канлӗн выртса ҫывӑрма пултараймастӑп… Эпӗ нихӑҫан та ӑна ҫавӑн ҫинчен каламан. Эпӗ каласа панине вӑл епле йышӑнасси те паллӑ мар-ха. Анчах унӑн ҫавӑн ҫинчен пӗлмеллех. Эпӗ урӑх ҫавна пӗлмесӗр тӳссе пурӑнаймастӑп. Хам шухӑшласа пурӑнни хама улталасан, манӑн луччӗ пӗтӗмпех хуйӑха ӳкмелле, вилмелле те пултӑр… Э! Эпӗ лаша ури сассине илтетӗп. Вӑл-ши? Ара! Йывӑҫсен хушшипе эпӗ унӑн ялтӑра костюмне куратӑп. Морис Джеральд вӑл костюма тӑхӑнса ҫӳреме юратать. Тӗлӗнмелли те ҫук — вӑл ӑна пит килӗшет… Таса турӑ амӑшӗ! Эпӗ серапэпе чӑрканса ларнӑ, ман пуҫ ҫинче сомбреро. Вӑл мана арҫын тесе шутлӗ! Сирсе пӑрахас ҫак килӗшӳсӗр маскӑна! Эпӗ хӗрарӑм, унӑн хӑй умӗнче хӗрарӑм тӑнине курмалла.

Исидора хӑйӗн хӗрарӑм илемне пытарса тӑракан серапэпе шлепкене хӑй ҫинчен вӑр-вар илсе пӑрахать.

Йӗнер пускӑчӗсем ҫинче кӑшт ҫӗкленерех те малалла тайӑларах тӑрса, вӑл кӗтсе тӑрать.

Унӑн хӗрарӑмла ҫӑмӑл кӗлеткипе илемлӗ пӗчӗк пуҫӗ симӗс ӳсентӑрансем хушшинче ӑраснах хитрен курӑнать.

Хӑй хӑратӑп тесен те, вӑл ним хӑранине те палӑртмасть. Тути чӗтремест, сӑнӗ шуралса кайни те палӑрмасть. Пачах урӑхла, вӑл малалла тӗллесе пӑхнинче мӑнкӑмӑллӑ юратун чӗвӗнӗ, хӑйӗн ӑмӑрткайӑкне кӗтсе тӑракан ӑмӑрткайӑк амин чӗнӗвӗ палӑрса тӑрать.

Анчах сасартӑк — мӗскерле тӗлӗнмелле улшӑну? Ылтӑн тӗрӗ ӑна улталанӑ. Мексиканец тумне тӑхӑннӑ юланут вӑл — Морис Джеральд мар, Мигуэль Диаз.

Хавассӑн кӗтсе тӑнӑ ҫӗртен хуйӑха ӳкмелле пулать. Пӗтӗм шанчӑка ҫухатса, вӑл йӗнер ҫине анса ларать. Ун ҫӑварӗнчен ассӑн сывласа илнисем туха-туха каяҫҫӗ, ку ӗнтӗ пӗтӗмпех хуйӑха ӳкнине пӗлтересси патне ҫывӑх. Анчах вӑл хӑрани палӑрмасть.

Эль-Койот малтан калаҫма пуҫларӗ:

— Сывӑ-и, сеньорита? Сире ҫак йӗплӗ чӑтлӑх вӑрманта тӗл пуласси ҫинчен кам шухӑшлас пур-ха?

— Сире вӑл нихӑш енчен те пырса тивме кирлӗ мар, дон Мигуэль Диаз.

— Тӗлӗнмелле ответ, сеньорита! Паллах ӗнтӗ, вӑл мана пырса тивет, мана тивме те кирлӗ. Эсир пит лайӑх пӗлетӗр эпӗ сире шутсӑр юратнине. Эпӗ сирӗн чуру тесе каласа панӑ чух, эпӗ ухмах пултӑм. Ҫав ӗнтӗ сирӗн кӑмӑла сивӗтсе те ячӗ.

— Эсир йӑнӑшатӑр, сеньор. Эпӗ сире юрататӑп тесе нихӑҫан та каламан. Эсир юланутпа ҫӳренине эпӗ юратнӑ пулсан, ҫавӑн ҫинчен вара эпӗ сире каланӑ пулсан, сирӗн унтан нимскерле вывод та тума кирлӗ марччӗ. Эпӗ сире пӑхса мар, эсир юланутпа пит лайӑх ҫӳреме пӗлнине пӑхса ҫеҫ савӑннӑччӗ. Вӑл ӗнтӗ виҫӗ ҫул ӗлӗкрех пулнӑ. Ун чухне эпӗ хӗрача анчахчӗ, ун пек чухне ҫавӑн йышши япаласем тӑн-пуҫа ҫавӑраҫҫӗ. Моральлӗ пахалӑхсем мар, тулашӗнчен йӑлкӑшни тӗлӗнтерсе ярать. Анчах халь ӗнтӗ эпӗ хӗрарӑм.

— Анчах мӗншӗн-ха эсир мана суя шанчӑк патӑр? Эпӗ чи чарусӑр буйвола тата сирӗн аҫун кӗтӗвӗнчи чи тискер лашана йӑвашлантарнӑ куна астӑватӑр-и? Пӗр кӗтӳҫ те вӗсем патне пыма хӑймастчӗ вӗт. Ҫав кун эсир мана йӑл кулса пӑхрӑр, сирӗн куҫра эпӗ юрату ҫинчен каланине куртӑм. Ҫавна ан тунӑр, донья Исидора. Манӑн опыт ҫителӗклӗ, ҫавӑнпа эсир мӗн шухӑшланине тата эсир мӗн туйса тӑнине эпӗ сирӗн сӑнран лайӑх пӑхса пӗлме пултартӑм. Анчах халӗ пурте улшӑнса кайрӗ. Мӗншӗн-ха? Мӗншӗн тесен эпӗ эсир илӗртнине парӑнтӑм. Е тата уншӑн та мар, акӑ мӗншӗн пулӗ: хам ухмах пулса эпӗ сире ҫавӑн ҫинчен каласа патӑм. Эсир вара ҫӗнтерсе илсе, ҫавӑн ҫинчен пӗлсессӗн, ҫӗнтернӗ ҫынпа интересленме пӑрахрӑр, кирек хӑш хӗрарӑм та ҫавӑн пек. Вӑл ҫапла, сеньорита, ан тунӑр ӑна.

— Ҫук, вӑл апла мар, дон Мигуэль Диаз. Эпӗ нихӑҫан та сире юратни ҫинчен сӑмахпа та, куҫпа та каламан. — Эсир маншӑн юланутпа пит лайӑх ҫӳрекен ҫын ҫеҫ пулнӑ, унтан ытла мар. Эсир ун чухне ҫавӑн пек пулнӑ, е ҫавӑн пекле туйӑннӑ. Анчах халь эсир мӗнле-ши? Пӗлетӗр-и эсир: сирӗн ҫинчен кунта мӗн калаҫҫӗ, кунта ҫеҫ те мар, Рио-Гранде тӑрӑхӗнче те.

— Эпӗ элеке хирӗҫ ответлеме кирлӗ мар тесе шутлатӑп — вӑл элек сутӑнчӑк туссенчен е суеҫӗ тӑшмансенчен тухсан та, пурӗпӗрех. Эпӗ кунта ӑнлантарса пама мар, хам ӑнлантару ыйтма килнӗ.

— Камран?

— Сирӗнтен, илемлӗ донья Исидора.

— Эсир ытла та хӑвӑра хӑвӑр шанса калаҫатӑр, дон Мигуэль Диаз. Ан манӑр, сеньор, хӑвӑр кампа калаҫнине. Эпӗ кам хӗрӗ пулнине ан манӑр…

— Рио-Гранде тӑрӑхӗнчи чи мӑнкӑмӑллӑ помещикӗн хӗрӗ тата Техасри ҫавнашкалах мӑнкӑмӑллӑ хуҫан хурӑнташ хӗрӗ. Эпӗ ҫавӑн ҫинчен пурин ҫинчен те шухӑшласа пӑхнӑ. Тата хамӑн ӗлӗк гасиенда пулнине те аса илтӗм, халь ӗнтӗ — лаша тытакан сунарҫӑ ҫеҫ ҫав. Caramba! Апла пулсан та, мӗнех вара? Эсир ҫын пуян маршӑн ҫеҫ ҫынтан йӗрӗнекен йышши хӗрарӑм мар-ҫке. Чухӑн мустангер та сирӗн умра, ҫӗр кӗтӳ тытса усракан хуҫа пекех, телее шанса, кӗтсе тӑма пултарать пулмалла. Манӑн эсир ырӑ чунлӑ пулнине кӑтартса паракан япала пур.

— Мӗнле япала? — хӑвӑрт ыйтрӗ Исидора, хӑй пӑшӑрханнине тин ҫеҫ палӑртса. — Ӑҫта вӑл япала?

— Акӑ ҫак пит лайӑх ҫырура. Акӑ вӑл, ман алӑра, донья Исидора Коварубио де-Лос-Ланос алӑ пуснӑскер; ҫыруне ман пекех чухӑн мустангер патне янӑ. Эпӗ ӑна сирӗн алла пама кирлӗ мар пулӗ тетӗп. Эсир ҫырӑва аякран та палласа илме пултаратӑр вӗт?

Вӑл ҫырӑва палласа илчӗ. Диаз ҫине ҫиллӗн пӑхса илни ҫавна палӑртрӗ.

— Ӑҫтан лекме пултарнӑ вӑл сирӗн алла? — тесе ыйтрӗ Исидора, хӑй тарӑхса кайнине пытарма тӑрӑшмасӑр.

— Вӑл кирлех мар. Ҫыру ман алӑра. Ҫавӑншӑн эпӗ тахҫанах тӑрӑшнӑччӗ. Эсир манпа интересленме пӑрахнине пӗлес тесе мар, — маншӑн вӑл ахаль те паллӑ пулчӗ, эсир урӑх ҫынпа интересленсе кайнине кӑтартакан япала пултӑр тесе. Ҫыру эсир Морис-мустангере юратни ҫинчен калать; эсир ӑна хитре куҫӗсенчен пӑхас тесе шутласа пурнатӑр. Анчах пӗлӗр, эсир ӑна нихӑҫан та курас ҫук.

— Вӑл мӗне пӗлтерет, дон Мигуэль Диаз?

Ответне илтесрен хӑраса, чӗтрекен сасӑпа ыйтрӗ Исидора. Тӗлӗнмелли те ҫук. Эль-Койот сӑнӗнче мӗн палӑрни ҫав тери хӑратса ячӗ ӑна. Ҫавна сиссен, Эль-Койот ответлерӗ:

— Эсир шикленнисем пит тӗрӗс. Эпӗ сире ҫухатрӑм, донья Исидора, анчах урӑх ҫын та никам та сире илес ҫук, — эпӗ ҫавӑн пек шут тытрӑм.

— Мӗн шут тытрӑр вара?

— Хам мӗнле каланӑ пек: урӑх ҫын никам та сире хӑйӗн тесе калаймӗ, пуринчен ытла Морис-мустангер.

— Авӑ епле?

— Ия! Эсир нихӑҫан та унпа хирӗҫ пулас ҫук тесе, мана сӑмах парӑр, ахалӗн эсир ҫак вырӑнтан каяймӑр.

— Эсир шӳт тӑватӑр-и, дон Мигуэль?

— Ҫук, эпӗ чӑнахах калатӑп, донья Исидора.

Ҫак сӑмахсене ним пытармасӑр калани ытла та паллӑ пулчӗ. Эль-Койот хӑравҫӑ пулнӑ пулин те, ун куҫӗнче сивӗ кӑмӑлпа хаярлӑх палӑрчӗ, алли ӗнтӗ кинжал авринчен ярса тытрӗ.

Паттӑр Исидора пӑлханмасӑр юлма пултараймарӗ. Хӑрушӑлӑх ытла та куҫа курӑнсах тӑнӑ, хӑрушлӑхран хӑтӑлса юлма май ҫукпа пӗрех туйӑннӑ. Хирӗҫ пулсан пирвайхи тапхӑртах унӑн чӗри пӑртак кӑрт туса илнӗ, анчах вӑл халь хута кӗрекен ҫын килсе ҫитме ӗлкӗрӗ тесе шанса тӑнӑ-мӗн. Калаҫма пуҫланӑ чухне ҫамрӑк мексиканка лаша ури сасси илтӗнмест-ши тесе хытӑ итленӗ. Вӑхӑчӗ-вӑхӑчӗпе вӑл ҫав сасӑ илтӗнес еннелле, вӗтлӗхелле пӑха-пӑха илнӗ.

Халӗ ӗнтӗ ҫав ӗмӗт пӗтӗмпех пӗтсе ларчӗ. Ҫырӑвӗ хӑй каймалли ҫын аллине пырса лекмен; пулӑшу килессе кӗтмелли ҫук ӗнтӗ. Вӑл тарас тесе шухӑшласа пӑхрӗ. Анчах кунта хӑрушлӑх тата ытларах пулнӑ. Ӑна ҫурӑмӗнчен пуля пырса лекетех пулӗ, мӗншӗн тесен Эль-Койотӑн пистолечӗ, кинжал пекех, алӑ айӗнче ҫывӑхрах пулнӑ.

Исидора тухса тӑнӑ хӑрушлӑха пӗтӗмпех хакласа илчӗ. Ун вырӑнче кирек мӗнле хӗрарӑм та аптӑраса кайӑччӗ ӗнтӗ. Анчах Исидора Коварубио хӑравҫӑ йышши пулман. Юнани хӑйне мӗнле те пулин пырса тивнине вӑл кӑшт та палӑртмарӗ.

— Пустуй! — терӗ вӑл. — Эсир манпа выляса хӑтланатӑр, сеньор. Эсир мана хӑратасшӑн. Ха-ха-ха! Мӗн-мӗн ман сирӗнтен хӑрас? Эпӗ сирӗнтен кая мар лассопа ҫӳреме пултаратӑп. Лассо та, сирӗн пекех, ҫӑмӑл та инҫе ывӑтатӑп. Пӑхӑр-ха, мӗнле эпӗ ӑна лайӑх тыткалатӑп!

Ҫав сӑмахсене йӑл кулса каласа, хӗр хӑй лассоне йӗнер пуҫӗ ҫинчен илчӗ те, хӑй искусствине кӑтартма шутланӑ пек, ӑна алли ҫине чӑркама пуҫларӗ.

Анчах унӑн шухӑшӗ урӑхла пулнӑ. Диаз ӑна ӑнланса илеймерӗ. Вӑл мӗн хӑтланнине пӑхса аптӑраса кайрӗ те ним шарламасӑр лаша ҫинче ларчӗ.

Хӑйӗн чавсисем йӗри-тавра лассо унки туртӑнса ларнине туйса илсен тин мексиканец Исидора мӗн тума шутланине ӑнланса илчӗ. Анчах кая пулчӗ. Тепӗр самантах унӑн аллисем аяккисем тӑрӑх чӑсӑлса кайса, хыттӑн ҫыхӑнса ларнӑ. Вӑл ӗнтӗ ни хӑйӗн кинжалне, ни пистолетне те туртса кӑларма пултарайман. Унӑн ункӑран хӑтӑлма та май пулман. Эль-Койот кантрана тивме те ӗлкӗреймерӗ, вӑл унӑн йӗри-тавра тата хытӑрах туртӑнса ларчӗ. Хыттӑн тӗртсе янипе вӑл йӗнер ҫинчен ывтӑнса кайрӗ.

— Халь дон Мигуэль Диаз, — тесе кӑшкӑрса ячӗ Исидора, лашине ҫавӑрса, — мана урӑх ан юнӑр. Хӑтӑлма та ан хӑтланӑр. Хӑрах пӳрнӳне тапратсанах, эпӗ лашана малалла чуптарӑп. Усал, чее чунилли! Ху хӑравҫӑ пулин те, эсӗ мана вӗлересшӗн пултӑн, эпӗ ӑна сан куҫранах куртӑм. Анчах пирӗн рольсем улшӑнса тӑчӗҫ, халь ӗнтӗ…

Хирӗҫ каланине илтмесӗр, вӑл чарӑнса тӑчӗ. Хӑй ывӑтнӑ лассо хыттӑн туртӑнса ларнӑ, вӑл ӳкнӗ ҫын ҫинчен куҫне илмесӗр пӑхса тӑнӑ.

Кантрапа аркантарса хунӑ Эль-Койот, ним тапранмасӑр, ҫӗр ҫинче выртнӑ. Лаша ҫинчен ӳкнӗ чух, вӑл вилнӗ пек туйӑннӑ.

— Таса турӑ амӑшӗ! Чӑнах вӗлертӗм-ши эпӗ ӑна? — терӗ Исидора, хӑй лашине пӑртак каярах чакарса. — Ун пек тӑвас теменччӗ-ҫке эпӗ. Анчах апла пулсан та, никам та мана ӳпкелеме пултараймасть, — вӑл мана вӗлермех шутланӑччӗ вӗт. Вилнӗ-ши вӑл, е хӑй патне пытӑр тесе юри вилнӗ пек пулать-ши? Ӑна урӑххисем пӗлме тӑрӑшчӑр. Халь ӗнтӗ эпӗ хӑюллӑнах киле кайма пултаратӑп, вӑл мана хӑваласа ҫитес ҫук. Унӑн пурнӑҫӗшӗн хӑрамалла пулсан, эпӗ пулӑшмашкӑн гасиендӑран ҫынсем ярӑп. Сывӑ пулӑр, дон Мигуэль Диаз!

Ҫав сӑмахсене каласан, Исидора корсаж хушшинчен пӗчӗк кинжал туртса кӑларчӗ, кантрана йӗнер пуҫӗ ҫумӗнченех касса татрӗ те, ним совесть ӳпкеленине туймасӑр, хӑй туртса ӳкернӗ ҫынна ҫӗре чӑсӑлса выртнипех пӑрахса хӑварса, сиккипе килелле вӗҫтерчӗ.

Menu

 

Statistics